Kan gå mot oppseiingar ved Havforskingsinstituttet

Havforskingsinstituttet har omlag tusen tilsette. Hundre av dei må vekk, og nokre av dei vil truleg oppleva at dei vert sagt opp.

— Me prøver oss først med frivillige ordningar, men me kan ikkje sjå vekk frå oppseiingar. Den vidare prosessen vil gi svar på det, seier direktør Nils Gunnar Kvamstø til Bergens Tidende.

I haust vart det sendt ut tilbod om sluttpakkar. 26 medarbeidarar søkte, og førebels er det innvilga 16 sluttpakkar.

Pakkane er etterløn i mellom seks og tolv månader, etter ansiennitet.

Havforsking

Kuttar i forskingstokt. Går ut over klimaforsking i Arktis

Hundre millionar i minus

Det er, som for andre i sektoren, dårlege økonomiske tider som er årsaka til at Havforskingsinstituttet no må nedbemanna. Det har vore kjent eit par år at det gjekk i motbakke. Allereie før jul i 2022 sa den då ganske ferske havforskingsdirektøren til Khrono at den økonomiske situasjonen var verre enn eg trudde.

— Tidlegare i haust sa eg på eit allmøte at me var i ein alvorleg økonomisk situasjon, men ikkje så alvorleg at det var behov for å seia nokon opp. Eg tok feil, sa Kvamstø.

Då var det allereie nedbemanning i reiarlagsdelen av Havforskingsinstituttet (HI). Sidan den tid har det mellom anna vorte innført tilsetjingsstopp. Men dersom det ikkje vert gjort tiltak, vil underskotet verta hundre millionar kroner i året, har Kvamstø sagt i haust.

forskningsformidling

Her viser forskeren fram ideene sine. Nå kan du se resultatet på Netflix

Ikkje konklusjon i år

BA skreiv i november at det nedbemanninga skal skje i løpet av dei neste tre åra. Ein del av nedbemanninga vil koma gjennom naturleg avgang. 

Kor tid det er klart kven som eventuelt misser jobben, er framleis ikkje klart.

— Prosessen er i gang, men mykje gjenstår til det nye året, seier Kvamstø til BT i dag.

Avisa har snakka med fleire tillitsvalde som seier at medlemmene deira har det vanskeleg.

— Å ta juleferie med så mange spørsmål som me ikkje veit svaret på, er ein vanskeleg situasjon, seier Ragnfrid Magnor-Jensen til BT.

Ho er tillitsvald i Delta, med omlag hundre medlemmer ved HI.

Terje van der Meeren er tillitsvalt for Havforskerlaget. Han seier at nokre tilsette no vurderer om dei må sjå seg om etter andre jobbar.