Hagen: «Godt for universitets­demokratiet»

På spørsmål frå Khrono om ein kommentar til at ho no får konkurranse om toppvervet ved Universitetet i Bergen (UiB), svarar Margareth Hagen på sms — og svært knapt:

«For oss som mener valgt rektor er det beste, er dette godt for universitetsdemokratiet», skriv den sitjande rektoren, og legg til: «Jeg ønsker alle en riktig god jul».

Ytterlegare kommentar vil ho komme tilbake til seinare, skriv ho.

rektorval

Kastar seg inn i rektorkampen i Bergen. Utfordrar Margareth Hagen

Vil vere alternativ

Hagen og hennar rektorlag har fram til no vore åleine om å stille som kandidat til rektorvalet ved UiB. Torsdag kunne Khrono melde at ho kjem til å få ein utfordrar:

Lise Øvreås, som er professor i geomikrobiologi ved Universitetet i Bergen og direktør for UiBs senter for berekraftig hav, Ocean Sustainability Bergen. Ho har sidan 2022 vore preses i Det Norske Videnskaps-Akademi (DNVA).

Med seg vil Øvreås ha klimaforskaren Endre Tvinnereim, truleg som prorektor. 

Ifølgje Tvinnereim stiller dei med «et svært sterkt og godt sammensatt lag og vil være et tydelig alternativ». 

Torsdag ettermiddag vart det klart kven dette laget vil bestå av, i tillegg til Øvreås og Tvinnereim.

Universitetet i Bergen

Dette er Lise Øvreås sitt lag til rektorvalet ved UiB

Fristen ikkje ute

Det meste tyder no på at valet vil stå mellom Hagen og Øvreås. Med det blir det også ein kamp mellom ein «humanist-rektor» og ein «naturvitar-rektor», begge rett nok supplert med lag som representerer ulike faglege leirar på universitet. Hagen har tidlegare vore dekan ved Det humanistiske fakultet i Bergen. 

Men tida er ikkje ute for å melde seg på i kampen: Fristen for å melde inn eller kome med forslag til kandidatar i rektorvalet går ut 5. februar 2025.

Ifølgje leiar for Det sentrale valstyret ved UiB, professor Eirik Holmøyvik, vil det bli arrangerte eit «offisielt» valmøte med kandidatane 19. mars. Utover dette står kandidatane sjølve for valkampen, på den måten at dei står fritt til å presentere seg i dei ulike einingane og miljøa på universitetet.