Ville valt seg Hagtvet som statsråd

Khrono har intervjua eit knippe interessante personar i akademia på e-post om året som snart er over og om året som kjem. 

Adventsprat

Astrid M. A. Eriksen

• Astrid Eriksen arbeider som forskar ved Senter for samisk helseforsking ved UiT Norges arktiske universitet. 
• Eriksen forskar på helse og eventuelle skilnader i vilkår mellom den samiske og den ikkje-samiske delen av folket.

Intervjua kan du lesa fram mot jul.

Astrid Eriksen arbeider som forskar ved Senter for samisk helseforsking ved UiT Noregs arktiske universitet. Konkret inneber dette å forska på helse og eventuelle skilnader i vilkår mellom den samiske og den ikkje-samiske delen av folket, å formidla kunnskap, og å delta i samfunnsdebatt.

— Kva er det beste og det verste som har skjedd deg i jobbsamanheng i 2024?

— Det beste er ekstraløyvinga som kom på statsbudsjettet for å finansiera og gjennomføra SAMINOR 3, ei helse- og levekårsundersøking i fleirkulturelle område frå Engedal i sør til Nordkapp i nord! Det verste har vore kompliserte søknadsprosessar med svært lang handsamingstid for å få tilgang til og lov til å bruka data for å gjennomføra forsking.

— Kva er det beste og verste som kan skje i 2025? 

— Det verste vil vera om globale konfliktar spissar seg enno meir til og om Russland vinn krigen i Ukraina. Det beste er om dette ikkje skjer.

— Korleis pregar den økonomiske situasjonen i sektoren arbeidskvardagen din? 

— Ei stadig jakt etter finansiering forstyrrar og utset forskinga for senteret.

— Kven i akademia fortener ei julestjerne? 

— Ph.d.-studenten vår Tone Engen fortener ei julestjerne for ein solid forskingsinnsats i eit utfordrande forskingsfelt!

— Om du kunne valt heilt fritt, kven vil du ha som den neste statsråden for forsking og høgare utdanning? 

— Bernt Hagtvet for tankane hans om forskings- og profesjonskompetanse og vilkår.

Fire kjappe:

— Fullfør setninga: Om eg var rektor for ein dag …
— … ville eg gjeve dei tilsette større rom til å la studentane kjenna seg sett og utfordra til kritisk tenking.

— Kva står på julemenyen?
— Pinnekjøt og riskrem! 

— Kva gler du deg minst til med jula?
— Å vaska huset … 

— Kva MÅ vera på plass for at det skal bli ekte jul?
— Smørbukk og familie